Militery zoonder soldoaten
‘t Is ietske meer as hoonderd joar eleden dat veur de eerste moal zoalt oet de groond is haalt in Bookel. Joarenlang is d’r in de groond boord en bunt d’r heel wat zekskes Jozo zoalt de weareld oawer goan.
In Bookel woont zo’n 2.500 leu en ’t is ’n doarp dat bie de gemeente Eanske heurt. Heel vol leu keant doar nog wal Bad Boekelo woar ’t op daag’n in de zommer onwies drok was en het golfslagbad onmeunig populear was.
In Bookel ku’j teagenswoordig nog ’n rit maken met n’n oalen stoomtrein en ku’j ôk het buurtspoorwegmuseum bezeuken. En wisse en zeker is doar de voetbalclub Unisson.
Maer het meest bekaend van de letse joaren is Bookel gewis worden deur de Military. Dat spektakel dat in ’t begin van de joaren 70 veur ’t eerst is hoaln, is oawer de hele weareld oetegreuid as ‘n bekeand peerdesport gebeuren woar elk joar zo’n 60.000 leu op offe koomt. En ai’j ’t woord ‘Military’ heurt of least dan denk iej geliek an ’n armee mear d’r keump gin soladoatenvolk an te pas.
'Alns zit bie de pries in!'
Dee leefhebbers van de Military kunt de peerde oawer zwoare hindernissen zeen springen, huppelen deur ‘t grös, deur waterpleske zeen goan en (mangs) een peerd met berieder teegn de groond zeen klappen. Alns zit bie de pries in! Biej ’n allerdaagse peerdenspringerieje pleart ‘t hinderhoalt daal mear biej n’n Military steet alns zo vast as ’n Dom van Muenster en keunt de peerde en ’n rieder lillik te passe kommen.
D’r bunt ôk vol ’leefhebbers’ dee noar Bookel komt mear zowat gin peerd zeet.
Dat bunt de gasten van de paviljoens en de geldgeavers ruumtes. Zee goat d’r hen om (nich völ) te kieken mear um annekeken te wörden. Met heudkes en heude, leerzen, ekstra annekochtge klere, n’n sjaal um en een glas voezel in de haand. En n’n hoond of ‘n hunneke d’r biej dat, geliek eur bazin, noar ’n hoarsnieder henne hef wes. Netwerken neumt ze dat ôk wal.
En ondaanks dat ze met de veut in ’n drek en in ’t stroo roond baggerd, zoas dat krek op ’n boerdriej ok meestieds ’t geval is, wördt d’r biekaans gin plat proat. ’t Geet meestieds op hoog hollaands en ok völ met n’n eerappel in ’n moond. Mear ’t bint wal de gealdgeavers van ’t gebuurn en doar kan ’t gaanse cirkus van in gang wörden hoalden. Doarum loaten zo.
Mear d’r bint ok genog keundige leu dee zik de euge oetkiekt hoo de peerde met eure berieder ’t allemoal kloar spölt. Mear ok wal mangs noar beneden stuitert en in ’n drab terecht koomp of in n’n waterplas duukt. As d’r gin maleur an te passe koomp is ’t wal vermakelik um te zeen.
Al met al is ‘t ’n gebuurn, dat Bookel en de umliggende kontreien wier op de kaarte zet en doar ma’w hier in Twente best bliej met wean. Goodgoan en völ plezeer doar in Bookel a’j d’r hen gaot of ’t op de tilvisie bekiekt.
Tinus Kroeds
MB (Möj Begriepen): Ai'j d'r hen goat hoaldt d'r dan rekkenschop met da'j rustig an praot aans wördt de vleermoeze wakker!