Verkiezingn
Zo, de verkiezings zitt d’r op. Ik deanke dat alleman het leewste har ehad dat zinne of öare partieje toch nog wat mear stemn har ekreegn. Mer stél, dat dit echt gebuurd was. Dee ééne partieje 100% van alle stemn. Wat dan?
Nemt de VVD. Dreks de luchthaven Lelystad lös, nen hoop leu in Oaweriessel en op de Veluwe met de vingers in de oorn: awier nen straaljager lege oawer de huze hèn, de henn van de leg, de beeste trekt de melk op. En in Amelisweerd gennen boom lenger te bekenn. Grös asfalteern. Dan he’j nog pas éne wekke Mark met Cora an het roer ehad.
Of nemt de PVV. Alle Marokkaann pakt rap ‘n koffer, Turken jaangt wier dwars duur Europa richting Erdogan. Alle daakn vol Zwarte Pietn en Geert as Sunterkloas probeern de Hollanders te blancheern.
En wat ducht oe van Siegried Kaag? As Alexander jöarig is, mutt Maxima, Amalia, Alexia en Ariane thoesbliewn, Sigrid löp dan met de twee heunde, Jette en Maurice, duur de versierde stroatn te chiln met het voetvolk. Of as Liliane Ploumen de mach hef… alle wichter van alle melkboern wordt dan in éénn klap tot echte wichter verkloard. En alns wat verkeerd gung oonder Ascher en Samson wordt wier rech-ebreaid. Ze dech dat dat tien joar kan doern. Wopke Hoekstra grimlacht superieur. De nit al te stoarke debatn zeent vergetten, Pieter Bromtzigt regelt dat het parlemeant noar Oaweriessel verhuust, der mangt allenig nog Tukkers biej de Belastingn en de UWV woarkn, dan wordt het vanzelf integer. Wat ducht oe van Jesse Klaver as premier? Het wordt oons greun en desnoods gel vuur de oogn, de helfte van de beeste en de bingn en de kuukms en de henn goat richting abattoir, en kiek: alle melk is op biej de supermarktn. En alle terrassen zeent wier lös mear iej köant nit länger oetsmijters besteln of lekkere bluks käze, en alle eaier zeent op. Tjea. De partij van de Dieren regeert vanoet Ouwehands Dierenpark, dan krie’j allenig nog vegetarisch etn. Synthetische kroketn, gehaktbälle en frikandeln veroorzaakt slim heimwee noar dröadjesvleais en zoalt spek in 'n moos. Getjan Segers en Carola Schouten vult de Eerste en de Tweede kamer met mekkernde lammern en sikke en opvalnd: de debatn veraandert gin spat. As Van der Staaij álle stemmen krig, kriege viej in elk geval elke wekke nen lock down van 24 uur. Röste en stilte.
Mer het blif biej disse dreumerieje. Viej munn het gewoon bliewn doon met Mark. Op de fietse. Met nen appel in de haande haalt-e de leu oawer um noar um te lustern. Is het al nit earder begunn met zonnen appel? Toen ha'j nog gin fietsen…
Gerrit Kraa