Traditie
Nit eens zo wied van hier lig ne middelkleine stad. Zo ene met liekvörmige vinex-barakken en strak anekearde hövkes, woer as iederene bie mekoar ofkik wo’j zo middelmoatig meugelik könt leaven. Natuurlik geet der ook wal es wat mis (iederene hef dezelfde truttige buxusheagkes of grieze greante met antracietene bloomväkke), mer duur mekoar zint ze et der oaver eens: wiej zint toch wal fatsoonlik volk.
Al joaren doot de wichter vootballen. Eerst nog gewoon op de stroate. Mer heanig verskof et vuur et skuurken van dat ene löagstoande hoes. Töt een poar grapjassen ontdekket dat et prachtig woark is um den bal tegen de kanteldure van de garage te daveren. Badangs! Badangs! BADANGS! Hoh, wat een kabaal! Mer ach, hef gin menske last van. Der wont ja nums. En wiej hebt allemoal jonk ewest, ja? Plear op!
Op nen goden dag komt doar in dat hoes nieje leu te wonnen. De familie Gario neudigt alle noabers oet vuur nen middag bröadselen in ’n hof um buurte te maken. Oh wat gezellig en wat zi'w toch feine leu. Ze heurt der al rap helemoal bie. Töt dee kleine snotape oet de stroate wier met den bal begint te stoten. Badangs! Badangs! BADANGS! In de kanteldure zit al nen besten duk in.
De niejen holdt zik de eerste tied heanig. Wilt nit vervelend wean. Mer de dure löp nit mear good en ze hebt kleine wichter dee ’s middaagns noar bedde mut. En ja, den duk wördt alverdan grötter. Op den doer wördt der et hele gezin op anekekken. Ze kriegt et zelfs as skeldnaam. Want jah, dat lik der toch nit op! A'j zonnen duk loatt zitten, dan he’j et toch nit helemoal terechte? Töt menear Gario een moal ’n kop oaverlöp. Hee stof noar boeten en bulket: “kan et misskien ook es ofelop wean met dat geplear? Kiekt es wat nen duk!”
De ooit zo vreandelike buurte slöt umme as een blad an nen boom. Wat meant dee van ‘n Duk wal nit? 'n Eersten röp: "Stelt oe nit an man. Onze wichter hebt der plezeer an.” Den tweeden: "Ik hebbe zelf machtig mooie herinneringen an dat stoten tegen dee garagedure. Wiej bedoolt dat nit vervelend tegen oeleu.” Den doarden: "Ha'j hier mer nit mutten goan wonnen.” Den veerden skrif een heel epistel op Facebook dat der bie vootbal altied al tegen nen bal eskupped wör.
Den viefden grip vuur de ogen van den kearl nen bal, legt ne to, nemp nen anloop en davert ne dan toch tegen dee dure, dat de roeten der bie trilt! Hee glop den kearl an en zeg: “Zo doo'w dat hier!”