Rekn
Ofgelopen wekke warren imkers en bouwvakkers gangs biej ’t kasteel. Ze bouwt nen spleenterniejn biejnstal nöast ’n Oosterhof. A’j heel eawen met dee vakleu kuijert, krie-j vlot wier nen breedern blik op de maatschappij.
In de gaauwigheaid gong ’t oawer good hoolt, beundig bouwen en klook rekken. Én het lea der mear an hoe’j keekn noar ciefers en getallen. Ze verteelden van nen garagehoolder van vroger den tellefonnummer 3005 har. En ar’e det opgaf, zear-e aaltied: dreehonderdviewe. Veun’e zelf gin bezwoar. Nen aandern zakenman har 2510. Um te onthoolden zear-e dan aaltied: kwartje-dubje. Toen de nummers oetbreaiden, köm der ne 1 biej vuur en toew zear-e: geuldn-kwartje-dubje.
Ik dachen an Garrad van Wevers. Ooit nömme de moate vuur ne nieje slagerswoarkbaanke van gestoomd beukn-hoolt. Noa ’t metten met ’n duumstok, schreef-e ’t op en zea der hard-op biej: “1 meter 12 en 3 streep; det is dan 1 meter 13!” Garrad har de fielesofie: better te laank as te kort, want te kort is aalt lastiger as ofzaagn.
Goocheln met getallen en ciefers blif gevoarlijk. Het is ook vuural verschillend hoe-j det allemoal oetlegnt. Allene mear één ciefer zeg al niks te völle. Loat stoan a’j ook nog oarns een gemiddelde van oetreknt. Doar krie-j aparte dinge van. A-j alle Hollaanders biej mekoar optelt, he-w gemiddeld ene börste…um mear gin aandere lichaamsdelen te neumen.
Statistiek is een woonderlijk vak. Der wordt ezegd: iej hebt kleane leugens, grote leugens én statistiekn. Det statistieken nit deugnt weet de leu dreks at Maurice de Hond der met zinne statistische vuurspelllingen wier ‘s froai nöast zit biej de verkiezingn. Mer at De Hond op dit momeant met zinne statistieken ankoomp tegen het coronabeleid, dan geleuwe viej ze juust wier heel geane. Het lig der ook mer an wa-j der met doot. A-j biej 't Oale Vear duur de Regge weelt lopen umdet 't doar gemiddeld enen meter depe is, kö-j vlot verzoepen. Oonzen leraar bedrijfseconomie har ook aalt 'n heel eagen waterdich economisch oetgangspeunt: "Geef je e één gulden uit, zorg dat je er twee voor terugkrijgt.”
Ooit verteelden miej Wim van Pongs oawer nen kloompenmaker oet Eanter. (Dee ha-j doar nog wal ‘s.) Op ooljoarsdag zat'e 's middaagns oonder de laampe en was nuks an 't rekken met 't zowat ofgelopen joar. Met een voldoan gezichte zear-e teegn de vrouwe: "Merie, viej hebt good verdeend.” Dee vrouwe keek met ‘n schuun oge nog eawen oawer de papiern hen en vreug: "Mer he-j 't hoolt dan wal met-erekkend?”
Woerop ’n kloompenmaker depe zuchend zea:
“Jea, a-j álns weelt rekn…”