Schriefwedstried 45 joarig bestoan van 'n Kreenk
Umdat ’n Kreenk dit joar op 21 november 45 joar besteet weelt wiej de finale van dee schriefwedstried hoolden op den zölfden zoaterdagnommedag. ’t Hele vuurjoar en zommer he’j tied um te schrieven tot ’n eersten september. Iej majt twee verhalen of gedichten schrieven oaver twee verschiedene thema’s.
Wiej hebt veer meugelijkheden:
- Dreumen bunt bedrog, of??
- 'n stukske oaver oen hoesdeer
- Oen mooisten Kreenkoamnd of middag
- Oen eagen vrieje keuze
Wiej hebt wal ’n paar regels woar iej oe an hoolden möt.
- Twee verhalen is nich verplicht, één verhaal en/ of gedicht is ok good
- ’t Verhaal mag 500 weure wean of korter en ’t gedicht 14 regels of korter
- Alle verhalen/ gedichten möt digitaal inleaverd wörden
- Bedeank zölf nen mooien titel, dus nich ’n titel van ’t thema
- Biej elk verhaal en gedicht möt ne Hollaandse vertaling in wörden leaverd
- Zet oen naam en oen volledige adres der oonder
- ‘n Lesten doatum da’j oene biejdroage in könt sturen: 1 september 2020! De verhalen/ gedichten möt in wörden steurd noar: avanderveer@kreenk.nl
Iej zölt ’t beleaven, a’j weet woar of ’t oaver möt goan, koomp ’t vanzölf.
As alle stukke binnen bunt geet ne jury an ’n slag um de mooiste verhalen en gedichten oet te zeuken dee op 21 november duur de schrievers zölf wördt vuurleazen. Doar bunt dan de oeteandelijke prieswinnaars ok biej. Vanzölfsprekkend maakt wiej wier ’n mooi book van de mooiste verhalen en gedichten. Alle schrievers kriegt den nommedag ’t book ok met noar hoes.