Henk van Kaamphoes
Ene van de trouwe leazers van dissen kaanttekst is Henk van Kaamphoes van de Hoolterweg.
Henk geet biej oons noar ’t Noorden en zit in ’t milnvak, nog nét oonder ’n groten hangzoolder. Henk vlög biej het Luchtvermaak en steet nog zekers zin männeke. Henk hef nen groten hof woer at’e greunte verbouwt.
Zélf zit ik het leenkervak en komme Henk dan zo’n betjen tegelieke tegen in det kroepe-portoal en doar dee Henk miej een verzeuk det de anleiding is van dit stukn.
De Noorderkoarke is ne biejzeundere koarke. In de joaren vieftig ebouwd um zo völle meugelijk leu in te verstouwen, een preakstool in ’t milden, leenks van ’n preakstool ‘de Wet’ en rechts de ‘apostolische geloofsbelijdenis’ en der tusken ne good gekneade preake van domie CA van Dieren.
Een een poar joar geleden is doar een gloepens mooi örgel in-eplaatst en doarna alverdan oonderhoold en nog eens oonderhoold. Det krie’j vanzelf biej oolde gebouwen. Het biejzeundere van dee koarke is det het an alle kaanten umringd is duur ne stroate en feitlijk ginne hoofdingaank hef. Is de vuurkaante biej de köster, of an de Ter Horststroate. Is het an de spoerkaante of an de kaante woer at ze kortens zonne betonperkeerplaatste hebt emaakt.
In de tied det ze dee koarke bouwen, leuten de leu de jässe oonder ’n dienst gewoon án, dus een fesoenlijke portoal woer at de leu roem de jässe koant toohangen en biej het votgoan wier köant anpakken, was toen gin mode.
Der is dan wal as compensatie nen niejen ingaank emaakt an ‘n Mölnstal, mear ik zee doar Henk van Kaamphoes een jas nit ophangen um vervolgens vúúr in de koarke binnen te kommen um zinne vaste stea op te zeuken. Ik zee Henk ook nit dreks in de bene goan biej de mansledenvergaderingen. ‘Wat een gemattel met dee jässe,’ zea Henk kortens tegen miej. ‘Skriewt doar is een stukn oawer.’
Henk pleaiten met miej om dee portöalkes völle grötter te maken. Ik helpe Henk gearne metdeanken. Der zeent jums genog koarken woer at ze ne mooie glazen serre biej de koarke hebt an-ebouwd. De authentieke elementen bliewt dan zichtboar, één of twee moal collecteren, dan zi-j de man. Een betjen glas-in-loodraams en de welstaandscommissie kan wier sloapen. Der zoalt völle leu van profiteren. Dee meeste leu goat der jums ook áchter oet, dus dóar zit de weenst.
Netuurlijk zal de oawerheaid zi’k der met bemeuien, mear a’j gedeuld hebt en tact van optreaden, mut det lukken.
Henk: ik steune oe! (Mear ik kan oe op ‘n breefke doon det dit der nooit van koomp.)
Gerard Voortman