Afbeelding
Foto:

Löag

Rechtevoort zeent de leu mirakels drok met zichzelf. Individualisme, “ik”, “ego”, iej mut woarken an oew eigen zelf. Gedurig krieg iej het advies da’j oew heuwd mut löagmaken. Sommigen loat zich dat gin twee keer zeggen. Ze goat lopen noar Santiago. Dat mu’j nit oonderschatten, ze wordt back-packer met nen rugzak met ne zichtboare Jacobsschelpe. En iej nemt een keaike met, dat leg iej dale biej het iezeren kruus van Rabanal del Camino, moch iej doar ooit ankommen. Ne route oetstippelen, boargschone anschaffen, ampatte sökken, wat nem iej met en vuural: wat loa’j thoes. Nee, nee, ik zin zelf nooit zo wied ekömmen, mear de kennis oawer dee reaize krie’j automatisch met, a’j lid zeent van wavonne vereniging dan ook, doar zit d’r aait wal ene, den dee reaize hef emaakt en dat wordt dus een avondvullend verhaal met powerpoint en dan is de centrale vroage: is het heuwd löag? Iej kriegt nit dreks joa of nee, iej kriegt eerst informatie oawer het gegeven da’j dan vuural oezelf tegenkomt, “dat het heel erg bij je binnen komt”, ofzeen, volhoolden, troanen en zo. Maar joa; het heuwd wordt löag.

Aanderen doot het wat seempeler. Kan ‘t nit met ne fietse? Elken dag een uur duur Hollaandsch Schwarzwald? Het leavert ne zadelkoonte op en allichte heimwee noar de tied da’j joonk waren en achter de wakelbuske vriejden… Zwemmen? Dan krie’j las van chloorallergie, ook nit wat. Schaatsen? As iej alverdan scheve schaatsen riedt, wordt doar het heuwd ook nit löager van. Waandelen, dan? Dan kom iej wisse leu tegen met nen hoond, woervan ze beweart dat-e nit bit, of dat dit de eerste keer is dat-e wál ebetten hef. Iej kriegt d’r wal een löag geveul van in de mage mear nit in ’t heuwd.

Op, dus, noar nen heuwdspecialist. Nen neuroloog, zoas professor Scherder den aait en oaweral een plastic heuwd met zich metslept, mear dan zoonder schedel, iej zeet de leenker en rechter hassenhelften en woar oew driften zit, oew geveul, oew seks-appeal, oew verslavingsmodules en wat nit al. ’n Neuroloog neamp het besloet um eerst ees nen hersenscan te loaten maken. Dat is ne hele oondernemming. Noa ne wekke de oetslag: heel geruststellend. Iej zeent een heel bezeunder geval: iej loopt al dee joaren al roond met een löag heuwd. Gin hassens… “Meneer, U lijkt op de premier uit het torentje, een leeg hoofd zonder herinnering an iets,” zeg ‘n neuroloog. “Ik hoop dat dit bij u binnenkomt…” Het is dus elukt. Iej komt thoes met een löag heuwd…

Gerrit Kraa