Cantate de Noël
De kasdeage stoat awier vuur de dure. De supermarkten maakt oe wies dat het allenig mear geet um oetzinnig te (vr)etten. De hoveniers hebt kasbeume in alle moaten. Ze hebt een apparaat woer a'j 'n kasboom duurhen köant trekken, da'j d'r dan plasticfolie umhèn kriengt. Kon wal ees geschikt wean vuur leu dee better wilt worden an de kasdeage. Der zeent verestig cursussen um te learen da'j zoonder stress duur al dee deage komt.
Ik gewe gratis nen tip um oe good vuur te bereaiden op de kasdeage. Niks betters as meziek. Nee, ginnen "grammofoon die stille nachtjes staat te morsen", zo as Wim Kan 't ooit dichtten. In 1956 köm Evert Westra, oonzen muziekleraar op de kweekschole met ne nieje grammofoonplate. "Mu'j ees lustern," zea-r-e. Het was de "Cantate de Noël" van Arthur Honegger. 'n Componist har der an ewoarket vanoaf 1941, de partituur was pas of in 1953, vlak vuur dat-e störf in '55. Afijn. Heel ampat, en hypermodern vuur dee tied. Gin romantisch geneuzel, mear gebaseerd op de oergedachte dat de meansheaid diepten van elleande veroorzaakt, en dat d'r een Kastkeend neurig is um oons te verheffen oet 'n drek tot hemmelse lofpriezing. Zo, dat heb ik mooi ezeg, al zeg ik 't zelf…
Ik har miej krek nen pick-up an-eschaft en wol dee plate hebben. Heel vake of espöald, gries edreejd, neumt ze dat. Via YouTube kö'j ook oetvoeringen bekieken. Met Wikipedia krieg iej wal informatie oawer het hoe en wat. As 't kan ansloeten op computer of tellevisie a'j 't orkest en koor wilt belustern én bekieken, en a'j 'Une Cantate de Noël' intikt, kö'j kiezen oet völle oetvoeringen. Mear het meujste veen ik de cantate met dirigent Chikara Imamura. Op 'n gegewen memeant wordt het nen machtigen chaos van klaanken, het mut ees duuster wean ear het lech wordt met daank an de Verlosser. Toch? Iej kriegt een prachtig mengsel van internationale kasvesjes, met nen bariton, een keenderkoor, een volwassenkoor, een örgel en ne complete instrumentale bezetting, en dat löp oet op een monumentaal 'Laudate Nominum omnes gentes' met nen trompet den alns op sleptöw neamp met de melodie van 'Wachet auf, ruft uns die Stimme'. En het scheait oet zoas het begeent: 'n cirkel is roond. Ik goa nit zo vear as den collega-kweekscholier, den noa ofloop van de plate flusterden: 'Da's miej net zo völle weard as 10 kas-preaken,' mear d'r zit wal iets in.
Nog enen weuns is dat Hosanna dat concert nog ees oetvoert, met Jacco Camphens as dirigeant, Dick Sanderman achter het örgel, Riessender keenderkoren tehope met 't Orkest van het Oosten. Doon! Dit advies is kets gratis. En nog nen gratis weuns d'r biej: gezeagende kasdeage en een good geluksallenjoar!
Gerrit Kraa