Afbeelding
Foto:

Heftantattat

Good niejs is gin niejs. Slechte verhalen doot in de media aaltied nog better as goo berichten. Klagen doo'w geane en akelige kwoalen oetgebreaid besprekken is nen moojn hobby van völle leu op verjöardage. Willem Wilmink skreef doar ooit al 's een mooi gedicht oawer, Heftantattat

Herman hef zo zeek ewes / Graads mut ook wier oonder 't mes
Trui hebt z'als al vot-enömn / Koops is oet de tied ekömn
Leida hef zon zeart'in 't lief / Oo, det oarme, oarme wief
En hoe is 't dan toch met Bernard? / Heftan tattat! Heftan tattat!
Hee har völs te völ'patat had / En toe hef'e 't dus an 't hart had

Van al det slechte niejs wor'k mangs een betje jachterig. Iej weet ook nit altied mear wa'j munn geleuwen. Ook oawer de natuur hele soombere verhalen. Göllende wichter beedt ministers smeekschriffen an um gaauw wat an 't milieu te doon. Dan dreigt der nen niejn iestied en dan wier krig Amsterdam het Middelandse Zeeklimaat van Bordeaux.
Netuurlijk snap ik det de dieken heuger munn at al dee iesboargen smeelt en det de iesbearen miskien wal broene bearen wordt. Mer der zeent al's earder greuntetuinen ewes op Groenlaand. En weant earlke: a'j hier 't hele joar 15 groad vorst hadden, dan ha'j alle joar nen Elfstedentocht, mer of det non zo fijn is…
Ik weet 't nit good mear. Der zeent jums ook vuurdelen. Twee hete zommers achter mekoar hebt de Hollaandse campings 't heel good edoan. Der is alderbassend völle beer verkocht, mer ook ies en limonade. De wienboeren in Hollaand hebt de dikste droewen seends dee eerste droewen-metting. Der zeent méár fietsen verhuurd en verkocht as ooit en de airco's warren nit an te sleppen. Het was absoluut een heel good kassenjoar en de leu met zonnecollectoren kriengt temet geeld too van Enexis.
Fealijk mut oawer zukke dinge méár eschrewen worden in de kraanten. Viej munn oons nog een betje anpassen an de klimaatveraandering. Viej munn méár oge kriegen vuur de vuurdelen. Det kan gaauw goan, want leu köant zik gaauw anpassen. Ene van miene beste kammeröa wes milden in det hete zommer op de camping in Zeelaand ewes. Ik vreug um wa'j dan doot at zowat 40 groad is. Hee zea: "Dan goa'k hen kleare kopen in Middelburg. Gin meanske in de modeweenkels met dee temperaturen. En dan kö'j miej toch nen hoop korting vroagen… En iej kriengt het ook nog!"