Tuskenbeaide kommen
Karel Schönfeld Wichers was slim drok met de Riessense sproake. Vake zat-e as getuge nöas 'n netoaris (Bernard, en later Van Schooten). En hee mos ook vake tuskenbeaide kommen. Dan zea 'n netoaris deftig zoiets as "de comparant, die op straffe van nietigheid"… of zo. En dan vertaalden Karel dat de betrökken partiejen gin onwettige kemoosies mochen oethalen, zoiets.
Miej duch dat dit vaker het geval was. Nen verpleegster, tusken de uroloog en de patient den froai las har van zearte an zin achterste, en dat 'n uroloog zea: "U heeft dankzij uw obstipatie complicaties met de faecaliën" en dat de assistente dan zea: "hee bedoelt da'j nit good van oewn hatten köttel of köant kommen, 't spil zit verstopt." Heel netjes was het nit, mear wal kloar as nen kloonten den muurvaste zat.
En zo zaten de steenfabrikanten 'n moal te hope met de hearen van het jute-spil an ne deftige toafel en doar köm 'n ober um te vroagen: "believen de heren nog jus bij de côtelette de porc?" en dat nen steenbakker an de jutebaas vreug: "wat vrög den keal toch?" en dat-e as antwoord kreeg: "o'j nog vet wollen oawer 't ruggenbutje."
Nog een vuurbeeld: Nen weenkeleer kreeg ne deftige dame vuur de teunbaanke ('help-desk' zollen ze rechtevoort zeggen). Zee zea: "ik wil graag een onsje chlorophylsnoepjes." De Riessensen grutter keek wat onneuzel, hee begreep nit dat het van dee zachte greune sukerkussentjes warn. Nen aanderen klaanten köm tuskenbeaide: "dat meanske vrög um van dee dinge dee zo tocht in 'n bek."
'n Apotheker Van der Veen vertealden 'n moal dat d'r nen oalen keal in 'n apotheek köm. Hee slingerden ne deuze vol zetpillen op de teunbaanke en zea; "hier he'j ze wierumme. Dee pillen helpt niks, iej köant ze net zo good in 't gat stekken." Doar was dus nit good bemiddeld tusken de farmaceut en de oale baas.
Ooit köm d'r nen domiej op hoesbezeuk. "Uw man niet thuis?" "Nee, dominee," zea de vrouwe, "hij is tuffels aan het roeien." 'n Oolderling köm tuskenbeaide: "Zijn Getheendrik is heen aardappels wieden."
Heden ten dage verschof het probleem richting Engels:
Doar köm de anstoande schoonzönne kennis maken. "Wat doo-j vuur de kos?" vrög de anstoande schoonva. "Ik zin account-manager op 'n office bureau." Dan mut de dochter schaamachtig oetleggen: het is nen tuskenbeaiden-kommer tusken de baas en de klaanten…" Is de va nog niks wiezer…
Gerrit Kraa