KAALSLAG
Krig et RKSV een niej vootbalveld? Wil Wessels ne gröttere Materieeldeenst? Kump der een helikopterlandingsstea vuur krakkemikkige mountainbikers? Et is der kaal bie de Kapoene an de Enterstroate. Lellik kaal. De oaverige stekige sprieten stoat der fidderig en onwennig bie.
As et good wear is räppel ik met plezeer tweemoal in de wekke met 'n droadezel oaver de Enterstroate hen en wierumme. Bie minder wear ook met wat minder plezeer, mer dat is een ander verhaal. Ik kan der van geneten as de beume wier ne wat vollere krone krieget, de busken langs de kanten, de zingende veugel dee der een hoes an hebt, de zuvere boslocht, et soezen van de töppe in de wind en de zachte koele skaa dee et 'n zommerdag gef. Neet edacht dat nog es op te biechten, mer ik worde blie van beume.
En ik neet allene. Talloze onderzeuken loat zeen dat beume heilzaam zint. Zelfs a'j in ne jachterige buje wat ekenplaatjes googlet, woarket dat al kalmerend. Doarnöast zuvert beume ook nog es de locht en dempt kabaal. Kortom: een menske hef baat bie greun. Beume for president!
Non he'w et geluk da'w in dit deel van et land nog wal wat bos oaver hebt. Misskien da'w doarumme in duursnede wal zo heanig in umgank zint hier. Mer op Europese skoale steet Nederland der skroa bie. Wiej zint et dunst beboste land van Europa. En op wat stadstoaten as Monako en Sunte Mariene noa et dichtst bevolkt ook nog es.
Wiej zitt mekoar froai kort op de lippe. In de Riessense Venneslagen (ook al zo kaal) resulteert dat der in dat leu mekoar verdan in de gaten holdt en wilt oavertroeven met opzichtige auto's op et oprit, kneehoge buxusheagkes in 'n hof en truttige sprökken in slecht Engels vuur de roeten. Doar zol mangs vuur de gemoodsröste nen flinken boom neet verkeerd wean. Of wat roew kröppelholt.
Mer de leste tied houwt Stoatsbosbehear slim met de botte biele um zik hen. Oaveral langs de kanten van de weg zee'j stapels stoffelike oaverskotten van ooit majestueuze woldreuzen. Ne samenzwearingstheorie wil dat de beume dale mut umdat ze een wearldwied wold van 5G-masten in de weg stoat. Doarmet köant regearingen oe dan op de millimeter precies in de gaten holden. Rap oew alu-heudjen op!
Mer vuur allens is ne verkloaring, a'j mer lange genog zeukt. Stoatsbosbehear zegt dat ze beume wilt oetroden dee as hier neet heurt, zodat de inheemsen nen kans kriegt.
Et zal wal an mie liggen, mer ik zee lever een mooi bos vol blöaiende exoten as ne volledig inheemse kale vlakte.