Sfeermeanske
Ik wil best weten da'k slim sfeergeveulig zir. A'k oarns ne segoare roeke, deank ik dreks an min Jan-eum: grootverbroeker van dikke Agio's Gouden Oogst. "Roken is dodelijk" steet 'r non op dee gooldklurige segoarndeuzen. Ofgelopen zoaterdag wa'k in Amsterdam. Op 't station in Deawenter mo'k eawen wochen op de ansloeting. Een vreandelijk meakn steun met een scheuldig gezichte te roken biej zonnen rookpoal. "Ja sorry," zea-r-e. Ik kon as sfeermeanske nit loaten um te zeggen: "Loat gewordn. Oewne segrette zet miej in enen klap terugge in heel gezellige tiedn!" "Ach, gelukkig," zea-r-e. In Amsterdam he'k vake grote musea bezoch, mer nog nooit het Amsterdams Historisch Museum. 'n Zoaterdag dus wal. 't Is een heel mooi stadsmuseum. De vaste expositie het: Amsterdam DNA – Ontdek het verhaal van Amsterdam. 't Begun met ne regel oet 'n bekeand wichterversje: Amsterdam die grote stad, die is gebouwd op palen… Amsterdam blik inderdaad op miljoenen pöale wean ebouwd, heaipöale um vaste groond te kriegen. Een bezeuk an Amsterdam is vuur een sfeermeanske allene mear compleet met een bezeuk an dee luxe segoarnzaak van Hajenius. Achterin zeent twee ofgeslötten ruumtes woer leu mangt roken. De ofzoeging steet 'r nit an. En det heurt ook zo, want a'j der oetkomt steenk-iej net as noa nen verjöardag woer min Jan-eum was. Roken wes toen nog nit slech. Binnen in 't hoes roken is rechtevoort ondeankboar en op de stroate wordt alverdan gezelliger, want der stoat hoe lenger hoe mear leu vuur boeten een deampke te doon. Hajenius hef 't lange teegn-eheulden, mer ook dizze luxe segoarnzaak mut dee groewlijke zwart-op-witteksen op de sjieke segoarnkistjes zetten. Gin gezichte. Ofgelopen zoaterdag wes een zoaterdag noa Baudet. Doarumme wes der ook ne grote demonstratie in Amsterdam. Nen alderbassenden hoop volk met motorplietsies vuurop treuk oawer 'n Dam en 't Rokin. Het leek wal of de koarke oetgung. Op de spandeuke steun: Nee tegen fascisme, nazisme, racisme, kapitalisme en seksisme. Hatte trommels en nen hoop leu in 't zwarte, völle bivakmussen op. Mangs reupen ze heel hard, mer oonderwiel kuijern ze tuskenduur heel gezellig met mekoar. Dudelijk ne sfeer van biej-mekoar-heurn. Een bloond meakn har een bord woer 't op steun: Liever een linkse slet dan 1 nacht met Thierry in bed. Inderdaad ne hele opoffering, duch miej. Der stroompeln ook een gries kearlke met in dee demonstratie. Hee leup achter nen rollator; zuurstoffleske vuurop in 't droad-iezern körfke. Oonder 't hoompeln steuk'e met bewerige vingers een lekker segretje an. Hee leek miej nit oongelukkig en toch ha'k met um te doon. Ik dachen nog: de nit-rokers hebt geliek, mer de rokers weet woerumme.