Pakketjuhh
Dat heur ik regelmoatig as ik de belle wier es oppakke (bie ons geet der ne tellefoon as iej op de belle drukket). As ik dan de dure lös doo, kump der nen stevigen jongen met brilleken en hese stemme de trappe op hechebalgen, um wier een klearepakket zus of zo (meestal vuur mien meaken) of te leaveren.
Altied plezerig, altied gerne wat te kwaken. Mer… nit te lange, want hee mut voortan. Koffie heb ik um wal es an eböaden, mer doar hef he gin tied vuur.
Nen kameroad van mie wol trouwen. En um zin hoes in 't Opbrook bietieds vuur mekoar te hebben deed ik um vanear vakkundig in de weg lopen bie et witten van et nieje leevdesnöst. Mer vuurda'j köant witten, mu'j eerst skoeren. Doar was ik met gangs bie de vuurdure, den as ik lös ezat had vuur et stoeven. Net toen as ik eaven binnen bie ne achterwande gangs was, gung -tingtong- de belle. Kameroad deed lös en ik heuren ne bekende hese stemme: 'pakketjuhh'.
Mienen kameroad krabben zik achter de oren: "ik hebbe niks besteld, ja." "Neenee, iej ok nich, is veur oew kameroad." Vuur mie dus. Hee har mie bie de vuurdure zeen terwiel as hee duur de nieje wieke jagen. En terwiel as der op et pakketjuh nen vrouwennaam opstund en een adres in ne totaal andere wieke, wus hee dat ik dee meesttieds annemme. Dat vind ik nog es knap. Doot den kearl nen dikken bonus, want zulke mu'j holden.
Oet Tubbige kump he, zovölle weet ik. Wat ik ook wete is dat den kearl wal mangs zes töt zeuven dage in de wekke woarket, zonder klagen. Zeker met dee storing bie de post van een poar wekken terugge, vertellen hee es in de halve minute dat ik em spreuk. Umdat iederene rechtevoort nit länger as nen dag op zin pakketje wil wochten. En as et een moal nit lukket, begint de leu meteen te bekken.
Wiej verget nog wal es dat der achter al onze koopdrift nog altied leu zit dee et allemoal mut oetvoren. Dee zik et snot vuur de ogen jakkert (bootes vuur egen rekkening) en skienboar vake fout parkeert um ne hoaste onhaalboare planning te halen. Dat geet net as in de Sovjettied: oh haal iej et? Dan kö'j ook nog wal een adresje mear.
Wat is der mis met ne wekke wochten? Doar gung et vuur tien joar terugge ook nog wal good umme. Dan he'j nog wat um noar oet te kieken. Bezit van de zaak is toch eande van et vermaak. En dan hef den bezorger es wat mear tied vuur ne komme koffie.
Martin ter Denge