I love Riessen
Oonze hoofdstad geet oonder an zin egen succes: het toerisme. Al dat geröatel van rolkoffers, de leu kriengt d'r zwil van in de oren. De toeristen mut dus vot oet de Raandstad. De Chinezen harren dat dreks al duur: dee zit non in Giethoorn.
En Riessen dan, kö-w doar ook nit wat metprofiteren van het Amsterdamse oawerschot? Ik gewe hier een poar tips, vuur niks nog wal. De gemeente mut wal eers investeren, mear doar hoof 't nit op vaste te zitten. Het mut beginnen met de wederopbouw van Wal- en Bouwstroate. Ne volledige reconstructie. Vot met de parkeerplaatse en 'n Citadel, de oale huze met de delle an de stroatkaante vanniessen opbouwen. De delle met de baanderdure. 'n Peardestal en 'n stal vuur de beeste, vuur 'n sik en vuur 't slachvoarken, de weafkamer en leenks en rechts ne heelde en 'n heujzoalder d'r tusken. En dan het wongedeelte met de opkamer, en zo verdan. En dan in 'n hof een ech huuske met ne driettonne.
Van groot belang is nen besten bult mest pardoes op de stroatkeajkes an de binnekaante van de stroatgotte. Zo krie'j nen bessen plear ruumtes woer a'j de toeristen köant loaten kieken. In sommige huze he'j echte Riessenders met jak en rok dee zit te spinnen, koffie te dreenken, (de vrouwleu gooit het restant van de koffie en 't mot pardoes oet de bouwendure op de stroate, de toerist maakt doar dan geane selfies van,) en doar he'j de keals in buis en mesjesterse bokse te proemen en kraanten te leazen biej 'n kachel (je brûle tout l'hiver) en een pleanken an de mure met doarop Vader Cats, Smietegeald en Met 'n oaln Màester biej n Heard.
En in aandere huze he'j ethuuskes met roo kool en hachée, oarfensoep, rebeten met siepels, broene bonen, moos met zoalt vleais, alns met zelfverbouwd spil oet 'n hof an de achterkaante. Wichter zeent gangs met knikkeren, peenkelen, hoepelen en zo. En as de leu duur dee stroaten zeent elop komt ze op 't Skeeld. Dat ken iej nit wier, doar is de Skeeldkoarke wier met 'n oorspronkelijken vuurgewwel en nen groten koarkhof an de ziedkaante, leenks vuuran 'n oalden toren van vuur 1823, zeuwen biej zeuwen meter in 't veerkaant, en doar spölt ze dan ne beleagering van de Spanjaarden, dat de leu in 't toorn vaste zit en lösgeald mut betalen, en aans wordt ze oet erookt. En oaweral hangt sprekwöare as "van de boer noar börger, dat geet as 'n örgel, van börger noar boer, dat geet pas zoer…"
Kiek, dan wordt 't vesje van Harm wier reeel: Iej kent Riessen nit wier…
Gerrit Kraa