Dreugte
Wat krig de dreugte van 2018 onmeundig völle andach. Vrömd genog heb ik tot op heden gin meanske eheurd oawer een verhaal oet 1903. Het verhaal "de groote droogte" steet in nen streekroman "Oostloorn" dat zich in Heemse biej Hardenberg hef of espöald, vlak noa de Doleantie van 1886.
Het book steun vake op de literatuurlieste van scholieren, het keanden völle herdrukken en het is vertaald in Duuts. Zweeds, Engels en Esperanto. De schriever is Siebold Ulfers, geboren in Koemeleinboeai op Celebes in 1852 en hee köm oet de tied in Zeist, in 1930. Hee was domiej in Domburg, Tienhoven, Oldemarkt en (lange tied ) in Rotterdam. In Oldemarkt heurden hee vertellen oawer de toestanden in Heemse. Iej köant het book noaleazen op internet via DNBL. Oké, het dut in 2018 wat oolderwets an mear het krig in 2018 ineens iets actueels. Viej zeent net as de leu in Oostloorn toch wat van de wieze. Woer geet dat op an met oonze dreugte? Domiej Ulfers beschrif de dreugte-periode mooi vanof het begin. Dat 't al dreuge was toen het vuurjoar begun. de natuur har het eerste in de gaten dat het slim dreuge zol worden. Dat de Vechte opmerkelijk lege was, dat het nit good gung met grös, rogge en bookweaite, dat de trekveugel votblewen, knappe observaties van Ulfers.
Op de website van weerstation Losser kö'j zeen dat Ulfers de gegevens nit hef bedach. In 1886 is de neerslag 754 mm, in 1887 545 mm en in 1888 754 mm., het was dus in 1887 völle dreuger. Gemiddeld! Maar in 't zommer extra slim dreuge.
In Oostloorn belengt de hervormden en de dolerenden nen Biddag, wal ieders ampat. Machtige preaken, bomvolle koarken, de leu zingt achter oet 'n haals.
De leazer verwocht dan dat 'n Biddag helpet. Dat het 'n volgenden dag baksteender en oale wiewe zal reagenen. Gin sprake van. De dreugte geet dom verdan. De leu reageert wesselend. Eerst zeent ze bange, dan beschaamd, dan skeuldig, ze wordt hellig, onverschillig, en dan goat ze massaal noar ne koarmse oarns wieterop en de schriever zeg fijntjes: 'het aantal huwelijken was een klein jaar later ééns zo groot". En pas half oktober geet het tergend laankzaam te reagenen.
Doarnoa leawt de leu wier onverstoorbaar verdan zoas ze vuur dee tied deden, dom verdan. Doar is éne Jörre den zich gedreg as vredestichter, hee gef anoniem een enorm bedrag um de leu te helpen. En zo krig het book heel wat mear loagen as allenig mer het verhaal zelf…
"Oostloorn" is ne schakeling van lösse verhalen dee tehope toch nen streekroman opleaverden. DNBL op internet, dus!
Gerrit Kraa