Martin ter Denge
Martin ter Denge Foto: Petra Koenderink

HANZESTAD

Et hef eaven edoerd, honderden joaren zelfs, mer dan he'j ook wat. Ne ofveardiging treuk vanear vanoet Riessen noar et Noord-Duutse Rostock, um doar de Hanzehearen met een voestdik onderzeuk um de oren te houwen. Dat hulp: Riessen is Hanzestad! Nen mooien titel. En as iej kiekt noar andere Hanzesteaden, is et dudelik dat öar dat ne mooie volle knippe hef op eleaverd: de kroepeströatjes en trapgevelkes van Deaventer, de deftige panden van Zwolle, et prachtige olde stadhoes van Kampen… (doar steet he nog wal, ja). En Riessen met öar… ja wat eagenlik? 'n Olden Harm zung et al: "iej kent Riessen nit wier". Et olde stadhoes, de skildskole, et Bondshotel... Al 'n duvel is der of esköaven. Van de andere kante hebt dezelfde klagers zik ook nooit met kettens an de hekken ebunden um dat tegen te holden. Mer woarheid blif et dat Old Town Riessen ginne skoonheidspries wint. Riessen is de Sovjetstad van Twente. Grauw, recht en kaal. Nen stapel oavertallige grindkeien woer mangs water langs löp as (pot)sierliken fontein. 'Mooi wonn', steet der as stil protest nog op nen gevel. Boetenof in 'n bos, richting Enter. Doar wal ja.
Mer heanig an wordt ze wakker in 'n road. Non as alleman verdan vaker de kleare van internet haalt, kump de modestad löag te stoan. En dan loop iej nen hoop centen mis, want loa'w earlike wean; leu komt nit vuur de mooie gebouwen noar Riessen. Voort kön iej der een kanon ofsketen. Ik zol zeggen: probeert et es, misskien wörd et der better van. Mer um toch nog wat toeristengeld te kriegen, mut ze wat anders verzinnen. Oplössing: van Modestad noar Hanzestad, met hanzehuze en gevels woer'j vuur de wille tusken wilt lopen. De Koejans is nen mooien anvang.
Iemand zea es dat niejbouw in dee olde stiel nep is. Nit authentiek. Kan wean, mer alle olde gebouwen hebt ooit niej ewest. Et Oost-Duutse Dresden is to 'n biespöl in den tweeden wearldkrieg kats an bölle skötten. Hebt ze prachtig in olden stiel wier op etrökken. En juust umdat et fonkelniej is, is et letterlik 'skitterend!'
Non wilt de hearen van Riessen vuur twentig doezend euro met een adviesbureau goan kieken wat vuur gebouwen et bewoaren weard zint. Hadden ze 40 joar terugge met mutten kommen. Non stoat der zowat oaveral lellike betonpuuste. Ik wil et wal vuur de helfte, dan he'w et binnen een half uur terechte. Doo'w doarnoa nog ne komme koffie met 'n appelgebakjen op ene van de kale bakkeivlaktes van Riessen.
Modestad, Hanzestad, hartstikke mooi, mer Riessen is vuural Bouwstad. Loa'w de mouwen opstreupen en zorgen dat leu oaver tien joar zegt: 'Wow! Iej kent Riessen nit wier!'

Martin ter Denge