Bataviastad
A'j echt van noamaak hooldt, mu'j vuur de oardigheaid noar Bataviastad. Feaitelijk is het ginne stad, der is gin centraal plein, ginne koarke, gin gemeentehoes, gin plietsie, iej zeent gin hoonde lopen, gin auto's, gin fietsen, gin rommel op de stroate, 't steenkt der nit noar nen viskroam, iej zeet gin zwoarvers en toch löp doar verdan een poar honderd man op de stroate. Weenkeln, gengeln, veuln an de kleare en aandere teuntelderieje. Een niej noamaakstadje op niej laand. Noarns aanders grötter contrast in ne weenkelstroate as doar. Het zet oe alverdan op 'n kop: oold en niej botst doar. Ne grote perkeerplaatse, ne dikke zwoare stadsmure met dree stadspoorten en good hoonderd weenkels dee at allenig mear moarkkleare verkoopt. Op een of aandere manere bedrög het oe verdan. De heulten weenkelskes munn het oolde Marken vuurstellen, allemoal mooie verschilnde gewelkes, mer ook det is allenig mear de vuurkaante. Van binnen is alns strak, stoalne frames, steaigerplaanken der umhen e-timmerd. Net echt. Het dut deanken an Curaçao oet de joaren van de West-Indische Compagnie. Nep-architctuur met echte Belgische waaltjes, mooie buxusheagjes, leai-leendes, zwoar hooltwoark en in de hawen ligt det noagebouwde Bataviaschip. Honderd weenkels, strak nöast mekoar en allemoal topmoarken: Adidas, Arrow en van Gaastra, Ichi, Kipling, Polo Ralph Lauren, Yaya en Zaza. Officieel is het een outlet shopping centrum, mear het is echt nit allenig oetverkoopspil. Det kearlke biej Ralph Lauren wol het miej nog wal oetleggen. Euren weenkel was toch echt gin outletspil zo as biej McGregor want det was oawerjoarig spil. Nee, zéé warren ne factory outlet. Allemoal niej spil, mear völle goedkeuper as euren weenkel an de Amsterdamse P.C. Hooftstroate. Doar had zin va een oawerhemd van honderd euro kocht en det kosten in de Bataviastad viewndartig euro meender. Vrömd: de deure moarken doot an kannibalisme, want juust exclusiviteit van dee deure moarken haalt ze noar dealten hen duur het vuur de gewone man betaalboar te maken zodet nen febrieksoarbeaider in hetzelfde poloshirtje geet lopen as nen magnaat van een betonfebriek den at vriejdaangs hen golfen geet. Normaal zee-j outletweenkels op industrieterreinen, mer hier is der ne complete stad van e-maakt. En het blik antrekkelijk te wean, want der steun mer énen weenkel te huur. Het personeel sprek oe vreandelijk too, dringt nul komma nul op en ze weet an de tellerkes biej een ingaank precies hoevölle man der binnen is ewes. Preenspoal kleare dus, een betjen sieroaden, nen weenkel met sukela, serviezen en bestek. Vuur de kearls zol der nen horlogeweenkel munn wean of zo, want oaweral zag iej dee oarme bleute vuur boeten stoan… -Gerard Voortman